27 снежня - свята святога Яна, Апостала і Евангеліста

Св. Ян быў любімым вучнем Пана Езуса.Быў сведкам Перамянення Пана і пакутаў у Аліўным Садзе. На Апошняй Вячэры заснуў на грудзях Збавіцеля. Паміраючы на крыжы, Пан Езус аддаў яму ў апеку Сваю Маці. Св. Ян напісаў тры апостальскія лісты, Апакаліпсіс і Евангелле. Згодна з прадказаннем Езуса Хрыста св. Ян памёр натуральнай смерццю ў позняй старасці. Евангелле св.Яна, якое дапаўняе іншыя мае найглыбейшы выклад Божых таямніцаў. Ва Ўсходнім Касцёле св. Яну нададзены тытул тэолага. У хрысціянскім іканапісе сімвалам св. Яна ёсць арол.

ЗАКЛІК

ант. Праслаўляем Пана, Валадара Апосталаў.

Псальм 95

Прыйдзіце, радасна спяваць будзем Пану, *

Узнясём вокліч да Скалы нашага збаўлення.

Станем перад абліччам Яго з праслаўленнем,*

Весела спявайма Яму песні.

ант. Праслаўляем Пана, Валадара Апосталаў.

Бо Пан – Бог вялікі, *

Вялікі Кароль над усімі багамі.

У Яго руках глыбіны зямлі, *

Вяршыні гор да Яго прыналежаць.

Уласнасць Яго – мора, якое сам стварыў, *

І зямля, якую зляпілі Яго рукі.

ант. Праслаўляем Пана, Валадара Апосталаў.

Прыйдзіце, праславім Яго ўпаўшы на твар, *

Укленчым перад Панам, Які нас стварыў.

Бо Ён – наш Бог, †

А мы – народ Ягоны, авечкі ў Яго руцэ.

ант. Праслаўляем Пана, Валадара Апосталаў.

Каб мы сёння пачулі Ягоны голас:

Няхай не ствярднеюць вашыя сэрцы як ў Мерыбе, *

Як на пустыні ў дзень Масса,

Калі спакушалі Мяне вашыя бацькі, *

Дасведчылі Мяне, хоць бачылі мае справы.

ант. Праслаўляем Пана, Валадара Апосталаў.

Праз сорак гадоў гэтае пакаленне ўзбуджала ўва Мне агіду, †

І сказаў Я: “Вось народ са згубленым сэрцам *

Не ведае маіх сцежак.”

І прысягнуў Я ў гневе, *

Што не ўвойдуць у краіну майго спачынку.

ант. Праслаўляем Пана, Валадара Апосталаў.

 Хвала Айцу і Сыну

 і Духу Святому,

 Як была спрадвеку цяпер і заўсёды

 і на векі вечныя. Амэн

ант. Праслаўляем Пана, Валадара Апосталаў.

Малітва

Усемагутны Божа, Ты праз святога апостала Яна адкрыў нам таямніцу Твайго спрадвечнага Слова, † просім Цябе, асвяці наш розум, * каб мы зразумелі і палюбілі абвешчаную ім навуку. Праз Пана нашага Езуса Хрыста, Твайго Сына, † які з Табою жыве і валадарыць у еднасці Духа Святога, * Бог, праз усе вякі вечныя.