МАЛІТВА НА ЗАКАНЧЭННЕ ДНЯ (КАМПЛЕТА) - ПАСЛЯ ІІ НЕШПАРАЎ У НЯДЗЕЛІ І ЎРАЧЫСТАСЦІ

К.: Божа, прыйдзі мне на дапамогу.

Усе: Пане, паспяшы да мяне на паратунак.

Хвала Айцу і Сыну, і Духу Святому,

як была спрадвеку, цяпер і заўсёды і на вякі вечныя. Амэн. Аллелюя.

(Падчас Вялікага посту Аллелюя не гаворыцца)

Рахунак сумлення і акт пакаяння

І форма акту пакаяння:

Пасля хвіліны цішыні ўсе разам чыняць пакаянне:

Спавядаюся Богу ўсемагутнаму * і табе, браце, * што зграшыў я вельмі * думкаю, словам, учынкам і занядбаннем,

удараючы сябе ў грудзі, гавораць:

мая віна, мая віна, мая вельмі вялікая віна.

Далей працягваюць:

Таму прашу Найсвяцейшую, заўсёды Панну Марыю, *  усіх Анёлаў і святых, * і цябе, браце, памаліцца за мяне * да Пана Бога нашага.

Кіраўнік просіць аб адпушчэнні грахоў:

С: Няхай змілуецца над намі Бог усемагутны * і, адпусціўшы нам грахі, * давядзе нас да жыцця вечнага. Усе: Амэн.

ІІ форма акту пакаяння:

кіраўнік гаворыць:

С: Змілуйся над намі, Пане.

Усе: Бо зграшылі мы супраць Цябе.

С: Акажы нам, Пане, Тваю міласэрнасць.

Усе: І дай нам Тваё збаўленне.

Кіраўнік просіць аб адпушчэнні грахоў:

С: Няхай змілуецца над намі Бог усемагутны * і, адпусціўшы нам грахі, * давядзе нас да жыцця вечнага. Усе: Амэн.

ІІІ форма акту пакаяння:

Кіраўнік ці вызначаны прадстаўнік супольнасці чытае наступны альбо падобны заклік, скіраваны да Хрыста, які заканчваецца словамі: Пане, змілуйся над намі.

С.: Пане, Ты пасланы аздаравіць скрушаных сэрцам, змілуйся над намі.

Усе: Пане, змілуйся над намі.

С.: Хрыстэ, Ты прыйшоў паклікаць грэшнікаў, змілуйся над намі.

Усе: Пане, змілуйся над намі.

К.: Пане, Ты сядзіш праваруч Айца, каб заступацца за нас, змілуйся над намі.

Усе: Пане, змілуйся над намі.

Кіраўнік просіць аб адпушчэнні грахоў:

С: Няхай  змілуецца над намі Бог усемагутны * і, адпусціўшы нам грахі, * давядзе нас да жыцця вечнага. Усе: Амэн.

Гімн

І тыдзень псалтыра

1 Ужо знікае дзённае святло.

Цябе мы просім, міласэрны Божа,

Твая апека няхай з намі будзе

І захавае ў Тваёй любові.

2 Хай сэрца наша, стомленае працай,

заўсёды, Пане, пры Табе чувае,

а калі новы дзень настане,

зноў з радасцю хай Бога праслаўляе.

3 Хай цела набірае сілаў,

А дух Табе ў адданасці ўзрастае.

Святлом сваім Ты напаўняй нас, Божа,

У цемры ночы.

4 Дапамажы нам, наш найлепшы Ойча,

Праз Твайго Сына, Пана Уцелаўлення,

Які з Табою ў адзінстве Духа

Над усёй зямлёй у хвале валадарыць. Амэн.

ІІ тыдзень псалтыра

1 Хрыстэ, Ты – дзень, поўны бляску,

Знішчаеш цемру начную,

У Табе пачатак святла ёсць

Яго Ты дорыш абраным.

2 Таму Цябе вельмі просім,

Абарані нас ад злога,

І адары нас спакоем,

І сілы новыя дай нам.

3 Калі ўжо сон нас атуліць,

Хай сэрцам будзем з Табою.

А слугаў, што Цябе любяць,

Ты захавай сваёй моцай.

4 Узглянь, наш Божа і Пане,

І беражы нас ад згубы

І аддалі ўсе спакусы,

Бо нас праз кроў сваю збавіў.

5 Хрыстэ, лагодны наш Пане,

Хвалу Табе мы ўзносім,

Айцу і Духу таксама

Чэсць і хвала няхай будзе. Амэн.

ІІІ тыдзень псалтыра

1 А як дзень ужо мінае,

Кожны з нас не забывае

Чэсць аддаць з падзякай Богу

За прабыту ўдзень дарогу.

2 Усе нашы дзённы справы

Прымі міла, Божа правы,

Пакіруй нам на збаўленне,

А на Тваё выслаўленне.

3 А калі паснем у ночы,

Май над намі Твае вочы,

Сцеражы ад злой прыгоды,

Барані ад кожнай шкоды.

4 Хай здаровы са сну ўстанем

і служыць Табе зноў станем:

душой, сэрцам, як хто можа,

працай на Тваю чэсць, Божа!

5 Барані нас ад зграшэння,

каб не страцілі збаўлення,

Але неба ўсе дасталі –

Цябе вечна выхвалялі.

IV тыдзень псалтыра

1 Прыйдзі, о Пане, бо ноч наступае,

Бляск сонца знікае на небе;

Ты – Сонца, што свеціць і не згасае

Для ўсіх Тваіх верных.

2 Твая прысутнасць для нас няхай стане

Бяспечным портам і месцам спачынку;

Напоўні сэрцы спакоем і цішай,

Найлепшы Ойча.

3 Будзь з намі таксама ў апошнюю хвілю,

Калі ўжо дачэснасць нябачнаю стане,

Вазьмі за руку і вядзі нас у дом Твой,

што вечна трывае.

4 Стварыцель і Божа, усяго, што жывое,

Прымі нашы просьбы і гімны,

што славяць Цябе, Усемагутны наш Божа

У Тройцы Адзінай і Вечнай. Амэн.

Псальмодыя

Ант. Пан атуліць цябе сваімі крыламі, * не будзеш мець страху начнога.

Псальм 91

Аб Божай апецы

Я даў вам уладу ступаць па вужах і скарпіёнах (Лк 10, 19)

Шчаслівы той, хто жыве пад заслонай Найвышэйшага *

ды пад ценем Усемагутнага.

Кажу я да Пана: †

Ты мой прытулак і цвярдыня мая, *

мой Бог, на якога спадзяюся.

Бо Ён ратуе цябе ад сеці лаўца, *

ад мору смяротнага.

Пер’ем сваім закрывае цябе, *

і пад крыллем Ягоным схаваешся.

Праўда Яго – *

шчыт і заслона.

Не палохайся страхаў начных, *

ні стралы, што ўдзень ляціць.

Не бойся мору, што ў цемры крадзецца, *

заразы, што ў поўдзень пустошыць.

Хоць бы тысячы побач з табой паляглі †

і мірыяды праваруч ад цябе, *

да цябе яна не падыдзе.

Толькі вачыма тваімі глядзець будзеш *

і ўбачыш з бязбожнымі расплату.

За тое, што ты казаў: †

Пан – надзея мая, – ды Найвышэйшага *

выбраў сабе за прытулак,

Не сустрэне няшчасце цябе, *

і пошасць не падыдзе да палаткі тваёй.

Бо ён дасць загад аб табе сваім Анёлам, *

каб цябе сцераглі на ўсіх сцежках тваіх.

На руках сваіх панясуць цябе, *

каб нага твая не спаткнулася аб камень.

На львоў і гадаў ступаць будзеш, *

львянятаў і змеяў патопчаш.

За тое, што Мяне ўзлюбіў ён, †

выратую яго і ўзвялічу, *

бо імя Маё ведае.

Будзе клікаць Мяне, дык Я выслухаю яго; *

пры ім Я ў тузе, вызвалю яго ды ўслаўлю.

Насычу яго доўгім векам *

і збаўленне Маё дам убачыць.

Ант. Пан атуліць цябе сваімі крыламі, * не будзеш мець страху начнога.

Чытанне                                                                                        Ап 22, 4-5

Слугі Пана ўбачаць аблічча Ягонае і імя Ягонае на чолах іх. І не будзе там ночы; і няма ў іх патрэбы ў светачы і ў святле сонца, бо Пан Бог асвятляе іх. І валадарыць Яму на вечныя вякі.

Рэспансорый

К.: У рукі Твае, Пане, * Аддаю я дух мой. Усе: У рукі Твае. К.: Ты нас адкупіў, Пане Божа верны. Усе: Я аддаю. К.: Хвала Айцу. Усе: У рукі Твае.

Песня з Евангелля

Ант. Захавай нас, Пане, калі чуваем, * беражы нас падчас сну, * каб мы чувалі разам з Хрыстом / і адпачывалі ў супакоі.

Песня Сімяона  Лк 2, 29-32

Хрыстус – святло народаў

Цяпер адпускаеш слугу Твайго, Валадару, *

па слову Твайму, з мірам;

Бо бачылі вочы мае збаўленне Тваё, *

якое падрыхтаваў Ты перад абліччам усіх народаў.

Святло для асвячэння язычнікаў, *

і хвалу народу Твайго Ізраэля.

Ант. Захавай нас, Пане, калі чуваем, * беражы нас падчас сну, * каб мы чувалі разам з Хрыстом / і адпачывалі ў супакоі.

Малітва на заканчэнне

Усемагутны Божа, мы ўшанавалі сёння таямніцу змёртвыхпаўстання Хрыста, † пакорна Цябе просім, няхай нас атуліць Твой супакой, * каб мы бяспечна адпачылі ад усялякага зла і з радасцю абудзіліся, каб праслаўляць Цябе. Праз Хрыста, Пана нашага. Амэн.

Ва ўрачыстасці, якія прыпадаюць па-за нядзеляй

Божа, наш Ойча, наведай гэты дом і аддалі ад яго ўсялякія варожыя пасткі; + няхай прабываюць у ім  Твае святыя Анёлы і захоўваюць нас у супакоі, * а Тваё благаслаўленне няхай заўсёды нам спадарожнічае. Праз Хрыста, Пана нашага. Амэн.

Ноч спакойную і смерць шчаслівую няхай дасць нам Бог Усемагутны, Айцец і Сын, і Дух Святы. Усе: Амэн.

Антыфоны на заканчэнне да Найсвяцейшай Панны Марыі

Вітай, неба Уладарка,

Вітай, Панна Анёлаў,

Вітай, Ружа і Брама;

Яснасць свету дала Ты.

Цешся, Панна хвалебная,

Па-над усё прыгажэйшая,

Вітай, Маці нябесная;

Заступіся за нас Ты.

альбо

Вiтай, Зорка мора,

Маці Хрыста-Бога, 

Панна найчысцейша,

Верным дапамога.

Ты, што прывітана

Словам Габрыэля, 

Умацуй нас ў веры,

Ўсім спашлі надзею.

Вызваль з путаў грэху,

Аддалі нядолю 

І напоўні сэрцы

Нашы супакоем.

І прасі, о Панна,

Ты за нас Езуса, 

Каб мы захаваны

Былі ад спакусаў.

Маці ласкі Божай,

Будзь для нас узорам —

Вызваленым з грэху,

Дай жыць у пакоры.

Памажы, Марыя,

Нам знайсці дарогу, 

Што вядзе да Неба,

Да яднання з Богам.

альбо

Вітай, Каралева, Маці міласэрнасці, жыццё, асалода і надзея нашая, вітай! Да Цябе звяртаемся мы, выгнанцы, дзеці Евы. Да Цябе ўздыхаем, стогнучы і плачучы ў гэтай слёз даліне. Дык звярні ж на нас, Заступніца нашая, Твае міласэрныя вочы. І Езуса, благаславёны плод улоння Твайго, з’яві нам пасля выгнання гэтага. О ласкавая, о наймілейшая Панна Марыя.

альбо

Тваёй абароне аддаёмся, Святая Багародзіца, у нашых патрэбах не пагарджай маленнем нашым. І ад усялякай злой прыгоды выбаўляй нас заўсёды, Панна хвалебная і благаслаўлёная.

О Пані наша, Апякунка наша, Суцяшальніца наша, Ты Заступніца наша,
з Сынам Сваім нас паяднай, Сыну Свайму нас даручай, Сыну Свайму нас аддавай.

У Пасхальны перыяд

Каралева неба, радуйся, аллелюя,

бо Той, каго Ты заслужыла насіць, аллелюя,

змёртвыхпаўстаў, як і сказаў, аллелюя.

Малі за нас Бога, аллелюя.

апрацавана на падставе:
Брэвіярый семінарыйны, Мінск 2001.
Камплета, Ольштын 2009.