МАЛІТВА НА ЗАКАНЧЭННЕ ДНЯ (КАМПЛЕТА) - ПАНЯДЗЕЛАК

 

 

К.: Божа, прыйдзі мне на дапамогу.

Усе: Пане, паспяшы да мяне на паратунак.

Хвала Айцу і Сыну, і Духу Святому,

як была спрадвеку, цяпер і заўсёды і на вякі вечныя. Амэн. Аллелюя.

(Падчас Вялікага посту Аллелюя не гаворыцца)

 

Рахунак сумлення і акт пакаяння

 

І форма акту пакаяння:

Пасля хвіліны цішыні ўсе разам чыняць пакаянне:

Спавядаюся Богу ўсемагутнаму * і табе, браце, * што зграшыў я вельмі * думкаю, словам, учынкам і занядбаннем,

удараючы сябе ў грудзі, гавораць:

мая віна, мая віна, мая вельмі вялікая віна.

Далей працягваюць:

Таму прашу Найсвяцейшую, заўсёды Панну Марыю, *  усіх Анёлаў і святых, * і цябе, браце, памаліцца за мяне * да Пана Бога нашага.

Кіраўнік просіць аб адпушчэнні грахоў:

С: Няхай змілуецца над намі Бог усемагутны * і, адпусціўшы нам грахі, * давядзе нас да жыцця вечнага. Усе: Амэн.

 

ІІ форма акту пакаяння:

кіраўнік гаворыць:

С: Змілуйся над намі, Пане.

Усе: Бо зграшылі мы супраць Цябе.

С: Акажы нам, Пане, Тваю міласэрнасць.

Усе: І дай нам Тваё збаўленне.

Кіраўнік просіць аб адпушчэнні грахоў:

С: Няхай змілуецца над намі Бог усемагутны * і, адпусціўшы нам грахі, * давядзе нас да жыцця вечнага. Усе: Амэн.

 

ІІІ форма акту пакаяння:

Кіраўнік ці вызначаны прадстаўнік супольнасці чытае наступны альбо падобны заклік, скіраваны да Хрыста, які заканчваецца словамі: Пане, змілуйся над намі.

С.: Пане, Ты пасланы аздаравіць скрушаных сэрцам, змілуйся над намі.

Усе: Пане, змілуйся над намі.

С.: Хрыстэ, Ты прыйшоў паклікаць грэшнікаў, змілуйся над намі.

Усе: Хрыстэ, змілуйся над намі.

К.: Пане, Ты сядзіш праваруч Айца, каб заступацца за нас, змілуйся над намі.

Усе: Пане, змілуйся над намі.

Кіраўнік просіць аб адпушчэнні грахоў:

С: Няхай  змілуецца над намі Бог усемагутны * і, адпусціўшы нам грахі, * давядзе нас да жыцця вечнага. Усе: Амэн.

 

Гімн

І тыдзень псалтыра

1 Ужо знікае дзённае святло.

Цябе мы просім, міласэрны Божа,

Твая апека няхай з намі будзе

І захавае ў Тваёй любові.

2 Хай сэрца наша, стомленае працай,

заўсёды, Пане, пры Табе чувае,

а калі новы дзень настане,

зноў з радасцю хай Бога праслаўляе.

3 Хай цела набірае сілаў,

А дух Табе ў адданасці ўзрастае.

Святлом сваім Ты напаўняй нас, Божа,

У цемры ночы.

4 Дапамажы нам, наш найлепшы Ойча,

Праз Твайго Сына, Пана Уцелаўлення,

Які з Табою ў адзінстве Духа

Над усёй зямлёй у хвале валадарыць. Амэн.

 

ІІ тыдзень псалтыра

1 Хрыстэ, Ты – дзень, поўны бляску,

Знішчаеш цемру начную,

У Табе пачатак святла ёсць

Яго Ты дорыш абраным.

2 Таму Цябе вельмі просім,

Абарані нас ад злога,

І адары нас спакоем,

І сілы новыя дай нам.

3 Калі ўжо сон нас атуліць,

Хай сэрцам будзем з Табою.

А слугаў, што Цябе любяць,

Ты захавай сваёй моцай.

4 Узглянь, наш Божа і Пане,

І беражы нас ад згубы

І аддалі ўсе спакусы,

Бо нас праз кроў сваю збавіў.

5 Хрыстэ, лагодны наш Пане,

Хвалу Табе мы ўзносім,

Айцу і Духу таксама

Чэсць і хвала няхай будзе. Амэн.

 

ІІІ тыдзень псалтыра

1 А як дзень ужо мінае,

Кожны з нас не забывае

Чэсць аддаць з падзякай Богу

За прабыту ўдзень дарогу.

2 Усе нашы дзённы справы

Прымі міла, Божа правы,

Пакіруй нам на збаўленне,

А на Тваё выслаўленне.

3 А калі паснем у ночы,

Май над намі Твае вочы,

Сцеражы ад злой прыгоды,

Барані ад кожнай шкоды.

4 Хай здаровы са сну ўстанем

і служыць Табе зноў станем:

душой, сэрцам, як хто можа,

працай на Тваю чэсць, Божа!

5 Барані нас ад зграшэння,

каб не страцілі збаўлення,

Але неба ўсе дасталі –

Цябе вечна выхвалялі.

 

IV тыдзень псалтыра

1 Прыйдзі, о Пане, бо ноч наступае,

Бляск сонца знікае на небе;

Ты – Сонца, што свеціць і не згасае

Для ўсіх Тваіх верных.

2 Твая прысутнасць для нас няхай стане

Бяспечным портам і месцам спачынку;

Напоўні сэрцы спакоем і цішай,

Найлепшы Ойча.

3 Будзь з намі таксама ў апошнюю хвілю,

Калі ўжо дачэснасць нябачнаю стане,

Вазьмі за руку і вядзі нас у дом Твой,

што вечна трывае.

4 Стварыцель і Божа, усяго, што жывое,

Прымі нашы просьбы і гімны,

што славяць Цябе, Усемагутны наш Божа

У Тройцы Адзінай і Вечнай. Амэн.

 

Псальмодыя

Ант. Ты, Пане, Бог ласкі * і ўсялякай міласэрнасці.

Псальм 86

Аб дапамозе ў няшчасцях

Благаслаўлёны Бог і Айцец, які суцяшае нас у кожным нашым няшчасці (2 Кар 1, 3.4.)

 

Нахілі, Пане, вуха Тваё ды пачуй Ты мяне, *

бо я бедны і ўбогі.

Захавай маю душу, бо я прад Табою скарыўся. †

Памажы Ты, мой Божа, слузе Твайму, *

які на Цябе спадзяецца.

Зжалься нада мною, Пане, *

бо ўвесь дзень да Цябе я клічу.

Суцеш душу слугі Твайго, *

бо душу да Цябе я ўзнімаю, о Пане!

Бо Ты, о Пане, добры і літасцівы, *

і шчодры на ласку для ўсіх, хто Цябе кліча.

Пачуй, о Пане, малітву маю *

і выслухай голас малення майго!

У час тугі маёй я клічу Цябе, *

бо Ты мяне выслухаеш.

Няма між багамі роўнага Табе, Пане, *

і няма спраў, як Твае.

Усе народы, што Ты стварыў, †

прыйдуць і ўпадуць на твар перад Табою, *

о Пане, і імя Тваё будуць славіць.

Бо Ты вялікі і цуды робіш, *

Ты Бог, Ты адзіны.

Навучы мяне, Пане, шляху Твайму, †

каб хадзіў я ў праўдзе Тваёй; *

сэрца маё умацуй у боязі перад іменем Тваім.

І буду ўсім сэрцам хваліць Цябе, Пане, Бог мой, *

і імя Тваё буду славіць навекі.

Бо ласка Твая нада мною вялікая, *

і Ты вырваў душу маю з бяздоння пякельнага.

Божа, пыхлівыя супраць мяне збунтаваліся, †

і натоўп пераследавальнікаў шукае душу маю, *

ды на Цябе не зважаюць яны.

Але Ты, Пане, Бог міласэрны і ласкавы, *

да гневу няскоры і ласкай ды праўдай багаты.

Да мяне звярніся і змілуйся нада мной; †

дай сілу Тваю слузе Твайму *

і сыну слугі Тваёй дапамажы!

З’яві Ты на мне знак Тваёй дабрыні, †

каб угледзелі гэта і тыя, што ненавідзяць мяне, *

і былі асаромленыя, што Ты, о Пане, мне дапамог і суцешыў мяне.

Ант. Ты, Пане, Бог ласкі * і ўсялякай міласэрнасці.

 

Чытанне                                                                                       1 Тэс 5, 9-10

Бог не празначыў нас на гнеў, але на атрыманне збаўлення праз Пана нашага Езуса Хрыста, што памёр за нас, каб мы, ці чуваем, ці спім, з Ім разам жылі.

 

Рэспансорый

К.: У рукі Твае, Пане, * Аддаю я дух мой. Усе: У рукі Твае. К.: Ты нас адкупіў, Пане Божа верны. Усе: Я аддаю. К.: Хвала Айцу. Усе: У рукі Твае.

 

Песня з Евангелля

Ант. Захавай нас, Пане, калі чуваем, * беражы нас падчас сну, * каб мы чувалі разам з Хрыстом / і адпачывалі ў супакоі.

Песня Сімяона  Лк 2, 29-32

Хрыстус – святло народаў

Цяпер адпускаеш слугу Твайго, Валадару, *

па слову Твайму, з мірам;

Бо бачылі вочы мае збаўленне Тваё, *

якое падрыхтаваў Ты перад абліччам усіх народаў.

Святло для асвячэння паганаў, *

і хвалу народу Твайго Ізраэля.

Ант. Захавай нас, Пане, калі чуваем, * беражы нас падчас сну, * каб мы чувалі разам з Хрыстом / і адпачывалі ў супакоі.

 

Малітва на заканчэнне

Усемагутны Божа, дай нам добра адпачыць † і учыні, каб зерне нашай сённяшняй працы * дало плён у вечнасці. Праз Хрыста, Пана нашага. Амэн.

 

Ноч спакойную і смерць шчаслівую няхай дасць нам Бог Усемагутны, Айцец і Сын, і Дух Святы. Усе: Амэн.

 

Антыфоны на заканчэнне да Найсвяцейшай Панны Марыі

Вітай, неба Уладарка,

Вітай, Панна Анёлаў,

Вітай, Ружа і Брама;

Яснасць свету дала Ты.

Цешся, Панна хвалебная,

Па-над усё прыгажэйшая,

Вітай, Маці нябесная;

Заступіся за нас Ты.

альбо

Вiтай, Зорка мора,

Маці Хрыста-Бога, 

Панна найчысцейша,

Верным дапамога.

Ты, што прывітана

Словам Габрыэля, 

Умацуй нас ў веры,

Ўсім спашлі надзею.

Вызваль з путаў грэху,

Аддалі нядолю 

І напоўні сэрцы

Нашы супакоем.

І прасі, о Панна,

Ты за нас Езуса, 

Каб мы захаваны

Былі ад спакусаў.

Маці ласкі Божай,

Будзь для нас узорам —

Вызваленым з грэху,

Дай жыць у пакоры.

Памажы, Марыя,

Нам знайсці дарогу, 

Што вядзе да Неба,

Да яднання з Богам.

 

альбо

Вітай, Каралева, Маці міласэрнасці, жыццё, асалода і надзея нашая, вітай! Да Цябе звяртаемся мы, выгнанцы, дзеці Евы. Да Цябе ўздыхаем, стогнучы і плачучы ў гэтай слёз даліне. Дык звярні ж на нас, Заступніца нашая, Твае міласэрныя вочы. І Езуса, благаславёны плод улоння Твайго, з’яві нам пасля выгнання гэтага. О ласкавая, о наймілейшая Панна Марыя.

 

альбо

Тваёй абароне аддаёмся, Святая Багародзіца, у нашых патрэбах не пагарджай маленнем нашым. І ад усялякай злой прыгоды выбаўляй нас заўсёды, Панна хвалебная і благаслаўлёная.

О Пані наша, Апякунка наша, Суцяшальніца наша, Ты Заступніца наша,
з Сынам Сваім нас паяднай, Сыну Свайму нас даручай, Сыну Свайму нас аддавай.

 

У Пасхальны перыяд

Каралева неба, радуйся, аллелюя,

бо Той, каго Ты заслужыла насіць, аллелюя,

змёртвыхпаўстаў, як і сказаў, аллелюя.

Малі за нас Бога, аллелюя.