03.05.2012г. – свята св. Філіпа і св. Якуба, Апосталаў.

Святы Філіп, як і святыя Пётр і Андрэй, паходзіў з Бэтсаіды і, як і яны, быў вучнем святога Яна Хрысціцеля, а потым стаў вучнем Хрыста. Гэта ён прасіў Хрыста ў час Апошняй Вячэры: "Пане, пакажы нам Айца". I пачуў адказ: "Хто Мяне ўбачыў, убачыў таксама і Айца" (Ян. 14, 8-9). Святы Якуб Малодшы, сын Альфея, паводле падання быў сваяком Езуса Хрыста, кіраўніком Ерузалімскага Касцёла  і аўтарам паслання, якое ўвайшло ў канон Святога Пісання. Ён адыграў выдатную ролю ў перыяд так званага ерузалімскага сабору. (Дз. 15, 13 і наст.). Памёр пакутніцкай смерцю ў 62 г.

ЗАКЛІК

ант.  Аллелюя. Праслаўляйма Пана,  /  Валадара Апосталаў.
 / Аллелюя.

Псальм 95

Прыйдзіце, радасна спяваць будзем Пану, *

Узнясём вокліч да Скалы нашага збаўлення.

Станем перад абліччам Яго з праслаўленнем,*

Весела спявайма Яму песні.

ант.  Аллелюя. Праслаўляйма Пана,  /  Валадара Апосталаў.
 / Аллелюя.

Бо Пан – Бог вялікі, *

Вялікі Кароль над усімі багамі.

У Яго руках глыбіны зямлі, *

Вяршыні гор да Яго прыналежаць.

Уласнасць Яго – мора, якое сам стварыў, *

І зямля, якую зляпілі Яго рукі.

ант.  Аллелюя. Праслаўляйма Пана,  /  Валадара Апосталаў.
 / Аллелюя.

Прыйдзіце, праславім Яго ўпаўшы на твар, *

Укленчым перад Панам, Які нас стварыў.

Бо Ён – наш Бог, †

А мы – народ Ягоны, авечкі ў Яго руцэ.

ант.  Аллелюя. Праслаўляйма Пана,  /  Валадара Апосталаў.
 / Аллелюя.

Каб мы сёння пачулі Ягоны голас:

Няхай не ствярднеюць вашыя сэрцы як ў Мерыбе, *

Як на пустыні ў дзень Масса,

Калі спакушалі Мяне вашыя бацькі, *

Дасведчылі Мяне, хоць бачылі мае справы.

ант.  Аллелюя. Праслаўляйма Пана,  /  Валадара Апосталаў.
 / Аллелюя.

Праз сорак гадоў гэтае пакаленне ўзбуджала ўва Мне агіду, †

І сказаў Я: “Вось народ са згубленым сэрцам *

Не ведае маіх сцежак.”

І прысягнуў Я ў гневе, *

Што не ўвойдуць у краіну майго спачынку.

ант.  Аллелюя. Праслаўляйма Пана,  /  Валадара Апосталаў.
 / Аллелюя.

 Хвала Айцу і Сыну

 і Духу Святому,

 Як была спрадвеку цяпер і заўсёды

 і на векі вечныя. Амэн

ант.  Аллелюя. Праслаўляйма Пана,  /  Валадара Апосталаў.
 / Аллелюя.

Малітва

Божа, з Тваёй ласкі мы штогод з радасцю адзначаем свята апосталаў Філіпа і Якуба, † праз іх заступніцтва дай нам удзел у цярпенні і змёртвыхпаўстанні Твайго Сына, * каб мы ў вечнасці маглі бачыць Тваю славу. Праз Пана нашага Езуса Хрыста, Твайго Сына, † які з Табою жыве і валадарыць у еднасці Духа Святога, * Бог, праз усе вякі вечныя.