25.04.2012г. – свята св. Марка, Евангеліста

Святы Марк быў сынам Марыі, у доме якой збіраліся вучні Езуса ў Ерусаліме. Суправаджаў святога Паўла і Барнабу ў місійных падарожжах, а потым быў памочнікам святога Пятра. Паводле паданняў, святы Марк запісаў у сваім Евангеллі вучэнне святога Пятра, а пазней заснаваў Касцёл у Александрыі і там загінуў пакутніцкай смерцю. У 830 годзе яго астанкі былі перанесены ў Венецыю.

ЗАКЛІК

ант.  Праслаўляйма Пана, / які да нас звяртаецца ў сваім Евангеллі, / Аллелюя.

Псальм 95

Прыйдзіце, радасна спяваць будзем Пану, *

Узнясём вокліч да Скалы нашага збаўлення.

Станем перад абліччам Яго з праслаўленнем,*

Весела спявайма Яму песні.

ант.  Праслаўляйма Пана, / які да нас звяртаецца ў сваім Евангеллі, / Аллелюя.

Бо Пан – Бог вялікі, *

Вялікі Кароль над усімі багамі.

У Яго руках глыбіны зямлі, *

Вяршыні гор да Яго прыналежаць.

Уласнасць Яго – мора, якое сам стварыў, *

І зямля, якую зляпілі Яго рукі.

ант.  Праслаўляйма Пана, / які да нас звяртаецца ў сваім Евангеллі, / Аллелюя.

Прыйдзіце, праславім Яго ўпаўшы на твар, *

Укленчым перад Панам, Які нас стварыў.

Бо Ён – наш Бог, †

А мы – народ Ягоны, авечкі ў Яго руцэ.

ант.  Праслаўляйма Пана, / які да нас звяртаецца ў сваім Евангеллі, / Аллелюя.

Каб мы сёння пачулі Ягоны голас:

Няхай не ствярднеюць вашыя сэрцы як ў Мерыбе, *

Як на пустыні ў дзень Масса,

Калі спакушалі Мяне вашыя бацькі, *

Дасведчылі Мяне, хоць бачылі мае справы.

ант.  Праслаўляйма Пана, / які да нас звяртаецца ў сваім Евангеллі, / Аллелюя.

Праз сорак гадоў гэтае пакаленне ўзбуджала ўва Мне агіду, †

І сказаў Я: “Вось народ са згубленым сэрцам *

Не ведае маіх сцежак.”

І прысягнуў Я ў гневе, *

Што не ўвойдуць у краіну майго спачынку.

ант.  Праслаўляйма Пана, / які да нас звяртаецца ў сваім Евангеллі, / Аллелюя.

 Хвала Айцу і Сыну

 і Духу Святому,

 Як была спрадвеку цяпер і заўсёды

 і на векі вечныя. Амэн

ант.  Праслаўляйма Пана, / які да нас звяртаецца ў сваім Евангеллі, / Аллелюя.

Малітва

Міласцівы Божа, Ты абраў святога Марка Евангеліста, каб ён абвяшчаў Добрую Навіну, † просім Цябе, асвяці нас, * каб мы, пабожна чытаючы яго Евангелле, навучыліся верна ісці следам за Хрыстом, Тваім Сынам, які з Табою жыве і валадарыць у еднасці Духа Святога, * Бог, праз усе вякі вечныя.